ՄԵՍՐՈՊԵԱՆԸ Բ. ԴԻՐՔԸ ԳՐԱՒԵՑ HANDS-ON-STEM ԳԻՏԱԿԱՆ ՄՐՑՈՅԹԻՆ Խմբագրել Էջը
Երք, 11 Հլս 2017

Հայ կաթողիկէ Մեսրոպեան բարձրագոյն վարժարանի աշակերտական խումբը Բ. դիրքը գրաւեց գիտական աշխատանքի մրցոյթին, որ կայացաւ Hands-on STEM ծրագրի շրջանակներուն մէջ: Մրցոյթի նախապատրաստական աշխատանքները ընթացած էին անցած տարեշրջանի գրեթէ ամբողջ տեւողութեան, հսկողութեամբ գիտութեան ուսուցիչ պարոն Գրիգոր էքմէքճեանի:

Մրցոյթին արդիւնքները ամփոփուեցան 6 Յուլիսին, Լիբանանեան համալսարանի Գիտութեանց կաճառին մէջ, Ֆանար: Կը մասնակցէին լիբանանեան 8 դպրոցներ: Մեսրոպեանի աշակերտները ներկայացուցած էին տարեց մարդոց համար դեղերու հայթայթման արագ եւ դիւրին համակարգ մը՝ շարժական դեղարան, որ շատ չնչին տարբերութեամբ զիջեցաւ առաջին դիրքը գրաւած աշխատանքին: Մրցոյթ-ցուցահանդէսին ներկայ էր Մեսրոպեանի տնօրէն պարոն Կրէկուար Գալուստ, որ շնորհաւորեց աշակերտները եւ յորդորեց անոնց շարունակել աշխատիլ այս յոյժ կարեւոր ծրագրի զարգացման ուղղութեամբ:

Hands-on STEM-ը  գիտա-կրթական կազմակերպութիւն է, որուն հետ Մեսրոպեան վարժարանը անցած տարեշրջանին հաստատեց գործընկերութիւն: Կազմակերպութիւնը կը միտի զարգացնել լիբանանցի աշակերտներուն գիտելիքները՝ գիտութեան, արհեստագիտութեան, ճարտարագիտութեան եւ ուսողութեան մարզերուն մէջ: Ծրագիրը Լիբանանի մէջ կը գործադրուի յաջորդաբար երկրորդ տարին ըլլալով: Անոր նպատակն է լիբանանեան դպրոցներուն մէջ յառաջացնել STEM (Science, Technology, Engineering, and Mathematics) ակումբներ եւ այդպիսով նպաստել աշակերտներու զարգացումին:




Փակ է Մեկնաբանութիւններու Համար
Անուն
Վերնագիր
Մեկնաբանութիւն